南丫島深灣6至10月封灘保護瀕危綠海龜產卵　誤闖禁區最高可罰款5萬港元

早前唔少香港人都會趁住好天氣好海灘、或郊外行行程抖抖氣。但嚟緊大家要注意喇！事關又到咗每年南丫島深灣沙灘封灘嘅時候～深灣沙灘每年6月至10月都會將沙灘部分地區封閉，方便南中國水域內嘅綠海龜上岸產卵繁殖。而期間漁農自然護理署實施封灘，禁止市民出入。

南丫島深灣沙灘每年都係南中國水域內綠海龜嘅產卵地點之一，所以又有海龜灣之稱。

海龜每年都會返到出生嘅地方產卵，而深灣出生嘅綠海龜每年6月至10月都會返嚟依度產卵繁殖。佢哋係一種好敏感嘅動物嚟，如果有人喺沙灘上，就會嚇怕海龜，令佢喺無法上岸產卵繁殖，從而被迫喺海中產卵，導致大批小海龜未出生已死於大海。

Photo from Mai Khao Marine Turtle Foundation

據《世界自然保護聯盟》指，綠海龜係被列入「瀕危」物種之一，科學家估計每1,000隻小海龜就需要10至15年時間成長，而當中更可能只有一隻可活至成年。

所以現時海龜均受到《野生動物保護條例（第170章）》，以及《動植物（瀕危物種保護）條例（第187章）》及其他條例保護。

Photo from wwf.org.hk

而綠海龜喺海洋生態系統中亦擔當重要角色，佢哋會將海草消化，為附近嘅動植物提供養份。

Photo from wwf.org.hk

因此每年香港漁農自然護理署每年除咗會封閉沙灘之外，亦唔建議市民喺依段期間內，喺深灣海域進行水上活動或者停泊、駕駛遊艇，導致海龜無法接近深灣水域嘅元兇。

Photo from 漁護署

另外，漁護署網頁亦有法例列明，依段期間任何人非法擅闖禁地即可能觸犯法例，最高可被罰款港幣5萬元。一般情況下，政府均不會允許市民進入限制地區觀光或消閑。在禁止通行期內，深灣設有執法人員巡邏，以管制非法擅進和監察綠海龜的產卵情況。

封灘範圍

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）